ჩინეთის სახალხო რესპუბლიკაში, ქალაქ სიანიანში ვიზიტის ფარგლებში, აჭარის მთავრობის თავმჯდომარე ზურაბ პატარაძე და ქალაქ ბათუმის მერი ლაშა კომახიძე სიანიანის ავტომწარმოებელ ქარხანას ეწვივნენ და კომპანიის წარმომადგენლებს შეხვდნენ. როგორც ზურაბ პატარაძემ აღნიშნა, ვიზიტის ფარგლებში დაიწყო მოლაპარაკებები ჩვენს რეგიონში ისეთი მნიშვნელოვანი და სასარგებლო პროექტის განხხორციელების შესახებ, როგორიცაა ბათუმში ჩინურ-ქართული ერთობლივი ავტოსაწარმოს გახსნა. აჭარის ა/რ მთავრობა სრულ მზადყოფნას გამოხატავს ხელი შეუწყოს ქართულ-ჩინური კონსორციუმის წარმატებულ საქმიანობას აჭარის რეგიონში. აჭარის მთავრობის თავმჯდომარის თქმით, აჭარაში აქტიურად გრძელდება როგორც საქალაქო, ასევე ურბანული ტრანსპორტის განვითარებისა და ავტოპარკის განახლების პროცესი. ზემოხსენებული ქართულ-ჩინური პროექტი კი დიდ წვლილს შეიტანს არამხოლოდ საქართველოს, არამედ მეზობელი რეგიონების სატრანსპორტო სფეროს განვითარებაში. ჩინეთის მხრიდან შეხვედრას კომპანიის აღმასრულებელი დირექტორი იე ლიზანგი, მისი მოადგილე კანგ ლეი, ქალაქ სიანიანის მერის მოადგილე ზანგ სიაოფანი, და ქალაქის საგარეო და საზღვარგარეთის საქმეთა ბიუროს ხელმძღვანელი ესწრებოდნენ. საავტომობილო კომპანიამ “სიანინგ ჯიუშოუმ” ავტობუსების წარმოება 1992 წელს დაიწყო. მის სახელს სუზუკების და მინივენების გამოშვება უკავშირდება.
