ქობულეთის კულტურის სახლში რამდენიმე წუთის წინ დასრულდა საზეიმო ღონისძიება, სადაც მუნიციპალიტეტისა და რეგიონის ხელმძღვანელ პირებთან ერთად ადგილობრივმა ინტელიგენციამ ქობულეთის პირველი სასწავლო დაწესებულების 120 წლის იუბილე აღნიშნა. პირველსკოლელებს მიესალმნენ და იუბილე მიულოცეს აჭარის უმაღლესი საბჭოს თავმჯდომარემ ავთანდილ ბერიძემ, ქობულეთის მუნიციპალიტეტის გამგებელმა სულხან ევგენიძემ, განათლების რესურსცენტრის უფროსმა მადონა გოგიტიძემ და სხვებმა. აღინიშნა ქობულეთის პირველი სასწავლო დაწესებულების ისტორიული როლი დედასამშობლოსთან ახლადშეერთებულ აჭარაში წერა-კითხვის გავრცელების და ძალად გამაჰმადიანებული საქართველოს ამ კუთხის ქრისტიანულ სივრცეში ინტეგრირების საქმეში. სცენაზე პირველსკოლელებმა მშობლიური სკოლის განვლილი გზა წარმოაჩინეს, ლექსით, სიმღერითა და ცეკვით მოეფერნენ აღმზრდელ პედაგოგებს, პატივი მიაგეს იმ ადამიანების ხსოვნას ვინც ამ წლების მანძილზე მუხლჩაუხრელად იღვაწა პირველი სკოლის კედლებში და თავისი კვალი დატოვა თაობათა აღზრდის საქმეში. ვრცელ მასალას საიუბილეო საღამოს შესახებ TV12 უახლოეს დღეებში შემოგთავაზებთ.
https://youtu.be/a39xyKUEMxQ
